កំពង់ចាម៖ ប្រធានអតីតគណបក្សសង្គ្រោះជាតិលោក កឹម សុខា បានដឹកនាំប្រតិភូទៅគោរពវិញ្ញាណក្ខន្ធសម្ដេចទេពញាណ ហ៊ុន ណេង នៅគេហដ្ឋានតម្កល់សពក្នុងខេត្តកំពង់ចាម នៅព្រឹកថ្ងៃទី៨ ខែឧសភា ឆ្នាំ២០២២នេះ។
ក្នុងពេលចុះគោរពវិញ្ញាណក្ខន្ធនោះលោក កឹម សុខា ក៏បានជួបសម្ដេចតេជោ ហ៊ុន សែន ដើម្បីសំដែងនូវមរណទុក្ខផងដែរ។
ថ្ងៃទី៥ ខែឧសភា ឆ្នាំ២០២២ ក្រោយពីទទួលដំណឹងពីមរណភាពរបស់សម្ដេច ហ៊ុន ណេង លោក កឹម សុខា បានផ្ញើសាររំលែកទុក្ខមួយជូនចំពោះសម្ដេចតេជោ ចូលរួមរំលែកទុក្ខនៅមរណៈទុក្ខដ៏ក្រៀមក្រំនេះ។
ជាការឆ្លើយតបសម្ដេចតេជោ ក៏បានថ្លែងអំណរគុណចំពោះការចូលរួមរំលែកទុក្ខពីលោក កឹម សុខា ផងដែរ។
សម្ដេចឧត្តមទេពញាណ ហ៊ុន ណេង បានទទួលមរណភាពក្នុងជន្មាយុ ៧២ឆ្នាំ កាលពីល្ងាចម៉ោងប្រមាណ ៦និង២៥នាទី ថ្ងៃទី៥ ខែឧសភា ឆ្នាំ២០២២នេះ ដោយសារគាំងបេះដូង។ បច្ចុប្បន្នសពរបស់សម្ដេច ហ៊ុន ណេង ត្រូវបានក្រុមគ្រួសារដាក់តម្កល់នៅគេហដ្ឋានក្នុងខេត្តកំពង់ចាម មុននឹងដង្ហែរទៅបញ្ចុះនៅវត្តសុវណ្ណគិរីរតនៈភ្នំប្រុស ភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាមនៅថ្ងៃទី៩ ខែឧសភា ខាងមុខ៕
